Coa difusión deste vídeo día 1 de xullo comezou a campaña para esixir a libre absolución das nove veciñas e veciños de Esplugues de Llobregat (Barcelona) encausadas/os por loitar contra o Pla Caufec e defender a Serra de Collserola. Seis delas poderían entrar en prisión por oporse a un plan especulativo que pretende urbanizar 40 hectáreas do pé da serra de Collserola para construir pisos de luxo, rañaceos de 105 metros de altura ou o centro comercial máis grande do norte de Barcelona, destruíndo a súa vila e a propia serra.
1.7.14
9.6.14
Xornadas en Vigo 25 de Insubmisión
Achegamos o programa das xornadas “25 ANOS DE INSUBMISIÓN, 25 ANOS DESOBEDECENDO”.
# Xoves 5 de xuño, 20:30, A Cova dos Ratos (Romil 3)
Proxección: 'Insumisión. 20 años desobedeciendo' - Documental realizado polo KEM-MOC de Bilbo.
# Sábado 7 de xuño, 20:30, A Cova dos Ratos (Romil 3)
Mesa redonda: 25 anos de insubmisión en Galiza - Coa presenza de insubmisos galegos.
# Sábado 14 de xuño, 20:30, A Cova dos Ratos (Romil 3)
Palestra: A Desobediencia Civil contra o Estado e a Criminalización da Protesta - José Ángel Brandariz. Profesor de Dereito Penal da Universidade da Coruña e antigo membro do MOC.
# Sábado 21 de xuño, 20:30, A Cova dos Ratos (Romil 3)
Mesa redonda: Estratexias de desobediencia actuais: okupación, desobediencia ao patriarcado, obxección fiscal - Con compañeiras/os do CSO Palavea, Rede Feminista Galega e Espazo Aberto Antimilitar.
# Sábado 28 de xuño, 20:30, A Revolta do Berbés (Rúa Real 12)
Palestra: Presente e perspectivas de futuro do antimilitarismo - Pablo San José do Grupo Antimilitarista Tortuga.
# Durante todo o mes de xuño. Do 3 ao 21 de xuño na Cova dos Ratos e do 23 ao 28 na Revolta.
Exposición sobre o movemento de insubmisión en Vigo, con materiais orixinais do MOC.
Organiza: Espazo Aberto Antimilitar
9 e 13 xuño - Mesas de recollida de sinaturas da ILP pola Renda Básica
A vindeira semana a ODS-Coia, o G.A.S. e a parroquia "Cristo da Victoria" volvemos ás rúas co obxectivo de continuar coa recollida de sinaturas da ILP pola Renda Básica.
O LUNS 9 de xuño de 10h00 a 13h00estaremos ás portas da delegación deFACENDA en Vigo (r/Lalín 2) para recollermos sinaturas.
E o VENRES 13 de xuño, tamén de 10h00 a 13h00, montaremos unha mesa de recollida de sinaturas diante do ALCAMPO de COIA (r/Grove 1).
Asina esta iniciativa para esixir aos representantes políticos a implantación dunha Renda Básica a nivel estatal. A Renda Básica establece o dereito de toda persoa a recibir unha cantidade periódica que cubra as súas necesidades básicas. Constitúese como un dereito individual, universal e incondicional. A contía da Renda Básica será a equivalente ao limiar da pobreza, é dicir, de 645,33 € tomando datos de 2013.
Agardamos polas vosas sinaturas!
Excelente comezo en Vigo da recollida de firmas pola ILP da Renda Básica (30/05/14)
ODS-Coia, GAS e parroquia do Cristo da Victoria xuntámonos, outra vez, para dar a coñecer a proposta da Renda Básica. Á entrada da delegación de facenda puxemos mesas, cadeiras, pancartas... e comezamos coa recollida de sinaturas. De 10h00 a 13h00 non pararon de achegarse persoas que apoiaron esta iniciativa coas súas sinaturas.
Neste acto estabamos acompañadas polas compañeiras do Espazo Aberto Antimilitar que animaron a facer Obxección Fiscal aos Gastos Militares co reparto de folletos informativos. É moi común a pregunta: temos cartos para unha Renda Básica? Ter os temos, pero se están ao servizo da guerra e dos intereses da industria militar non os haberá para cubrir as necesidades básicas das persoas.
Nuns días volveremos ás rúas para continuar coa recollida, porén a xente que estea interesada en asinar o pode facer na ODS-Coia todos os luns de 17h00 a 19h00 nos locais da parroquia do Cristo da Victoria (Baiona 9, Coia – Vigo).
Achegamos o texto que elaboramos para o acto:
Hoxe concentrámonos diante do edificio de Facenda convocadas pola Oficina de Dereitos Sociais de Coia, a Parroquia Cristo da Victoria e o Grupo de Axitación Social (GAS) co obxectivo de comezar coa recollida de sinaturas da Iniciativa Lexislativa Popular pola Renda Básica. Trátase, sobre todo, de informar á cidadanía sobre a alternativa real que supón a Renda Básica coma instrumento transformador de loita contra a pobreza e de xustiza social, pero tamén, coma moitas outras veces, de saír á rúa para denunciar publicamente a situación de total indefensión e precariedade na que as institucións públicas deixan a unha poboación cada vez máis empobrecida, vítima dun sistema económico excluínte que impide que dispoña do imprescindible para vivir con dignidade.
As cifras son so cifras, e pouco poden dicir dos auténticos dramas persoais que agachan detrás, pero non menten. Medra día a día o número de persoas e familias que viven (ou malviven) por baixo do limiar da pobreza (máis do 20% da poboación estatal, segundo a Enquisa de Condicións de Vida realizada en 2013 polo Instituto Nacional de Estatística). Pero do mesmo xeito medra sen descanso o número de ricos: 1625 persoas cun patrimonio superior aos 23 millóns de euros, o que supón un 7% máis que o ano anterior. A riqueza común, en fin, acumulada nas mans dun poucos, mentres unha crecente porcentaxe da poboación carece do máis elemental.
Fronte a estas cifras que falan con claridade da inxustiza social, as solucións existen e veñen da man da cidadanía que se organiza e busca alternativas para unha vida digna.
Deste esforzo colectivo e do convencemento de que é imprescindible comezar por un real reparto da renda e da riqueza, nace a campaña de recollida de sinaturas da INICIATIVA LEXISLATIVA POPULAR POR UNHA RENDA BÁSICA ESTATAL.
Concibimos a Renda Básica como un instrumento de erradicación da pobreza, un mecanismo de repartición da riqueza e distribución da renda, que pode dar seguridade económica á poboación; que permite iniciar outros modos de vida, fomenta a igualdade de xénero e contribúe a eliminar os estigmas sociais. A Renda Básica pode ser o piar do novo sistema de benestar e un instrumento útil para defenderse da deterioración das condicións de vida que impón o capitalismo global.
A Renda Básica que defendemos non é unha esmola, nin unha prestación asistencial, nin un salario de pobres, senón un dereito inherente á condición de persoas, un dereito coas características de individualidade, universalidade e incondicionalidade.
A ILP pola Renda Básica pretende ser unha ferramenta para sacar da intemperie a milleiros de persoas, mais tamén para combater o medo e a desmobilización social. “Non hai pan para tanto chourizo” berrouse con carraxe nas prazas. Si hai e debe haber recursos para garantir unha vida austera, pero digna, a todas as persoas.
Por todo o exposto, presentamos esta ILP que establece o dereito á Renda Básica, é dicir, o dereito de toda persoa a recibir unha cantidade periódica que cubra as súas necesidades básicas; un dereito individual, universal e incondicional, cunha contía equivalente ao limiar da pobreza (645,33 €/mes) e cunha aplicación gradual en dúas fases: de xeito inmediato trala aprobación da Lei para todas as persoas que non teñan cobertura por desemprego e non dispoñan doutros ingresos, e tamén para aquelas cuxas rendas sexan inferiores á contía da Renda Básica; e nunha segunda fase, para o resto da cidadanía.
Porque temos dereito a vivir con dignidade: RENDA BÁSICA, XA!
Vigo, 30 de maio de 2014
ODS-Coia - Parroquia Cristo da Victoria - Grupo Axitación Social
14.5.14
Escrache á Banca 21/05/2014 en Vigo (convoca a PAH)
O dia 21 de maio .ás 11.30 a PAH VIGObaixoMiño convoca a toda a cidadanía a sinalar en primer luga ra BANCA como parte do entramado politico ,(As politicas austericidas levadas polo Goberno do PP e a BANCA )
queremos entrar na campaña politica sinalando os responsables da actual situacion de empobrecimento que esta a sufir noso povo.
Os invitamos a este primer acto
Xa que este é só o pistoletazo de saída. A complicidade do poder financeiro e o poder político, da man hoxe do Partido Popular, obríganos a informar os cidadáns de que supón votar ao PP.
Que supón votar ao PP.
Votar ao PP é votar a favor dos poderosos en contra do pobo
Fronte aos brotes verdes do PP, fronte ás mentiras da recuperación que obvian a situación de miles de persoas, das persoas da rúa, das familias, os datos reais da cidadanía falan por se sós.
Acudiremos con cartolinas VERMELLAS (PP ) e cartolinas VERDES (PAH,CIUDADANÍA) fronte á BANCA ,en o "cruzamento dos 4 B en Vigo" como inicio da nosa campaña...
ACODE CONNOSCO DI NON Á #BANCACRIMINAL
Difunde Compra dos cartulinas una VERDE (da cidadacinía ) e outro VERMELLO (que reperesenta o PP )
Pon en cada un una frase positiva para nos e outra para o PP ( o PP rescata a Banca )....
A concelleira de Benestar Social non é quen de dar solucións ao colapso das Axudas de Emerxencia Municipais 9/05/2014
Dende o concello os responsables políticos: alcalde e concelleira de benestar social, dan a calada por resposta perante o atasco das axudas de emerxencia municipais.
Semella non lles importar os atrasos insoportables que teñen que padecer as persoas que buscan nestas axudas unha saída ao problema que trae para moita xente a insuficiencia de recursos para cubrir as necesidades básicas.
Por iso o VENRES 9 de maio, ás 11h00, a ODS-Coia, o Grupo de Axitación Social e parroquia do Cristo da Victoria fixemos unha CONCENTRACIÓN ás portas do CONCELLO perante o colapso das Axudas de Emerxencia Municipal.
Centos de nenos e nenas estaban na praza do rei para celebrar o Correlingua. Non o sabiamos, pero Isaura Abelairas alí estaba para abrir o acto desta festividade da lingua galega.
Coma tantas outras veces, a anterior o venres 2 de maio, ducias de persoas acudiamos ás portas do concello para denunciar que non aguantamos máis. O empobrecemento está a golpear moi duro na vida de moitas persoas que buscan nos servizos sociais respostas para cubrir as necesidades máis básicas. Moitas veces temos falado dos problemas que sufrimos coa RISGA, pero estas últimas semanas estamos a mirar para a xestión que está a facer o concello das AEM. Atrasos insoportables, indefensión, opacidade... son atrancos cos que se atopan demasiadas persoas que buscan nelas algunha saída aos seus problemas.
Ata hoxe, a resposta pública dos responsables políticos municipais era o silencio. Hoxe isto cambiou. Ao rematar o acto de presentación do Correlingua, Isaura Abelairas mantivo unha conversa cunha compañeira que se lle achegou a darlle unha copia do manifesto.
Solucións non ofreceu. Si unha morea de desculpas: o goberno central impídenos a contratación de persoal, este asunto non é da nosa competencia, en breve estará o cheque social...
Tras poñer en común a compañeira as (sin)razóns da concelleira, limos o manifesto e berramos lemas coma: “Renda Básica, XA” ou “Vivir dignamente é un dereito” para pechar a concentración dándolles as grazas a todas as participantes e sendo convidadas pola xente de IMÁN ao acto que van celebrar o xoves 16 de maio.
Achegamos o MANIFESTO lido na concentración:
Unha vez máis saímos á rúa convocadas pola ODS-Coia, a Parroquia Cristo da Victoria e o Grupo de Axitación Social (GAS) para denunciar a situación de total indefensión e precariedade na que as institucións públicas deixan a unha cidadanía cada vez máis empobrecida, vítima dun sistema económico excluínte que impide que dispoña do imprescindible para vivir con dignidade.
Desta vez concentrámonos diante do concello, como xa fixemos a semana pasada, co obxectivo de denunciar a insoportable demora que nos últimos meses se está a dar na xestión das Axudas de Emerxencia Municipal (AEM), que teñen como obxectivo “satisfacer necesidades básicas en relación coa alimentación, o aloxamento ou calquera outra situación que poida supoñer un factor de marxinalidade ou risco de exclusión social”. Debido ao “colapso” na tramitación destas axudas, na actualidade preto de 3000 unidades de convivencia están a agardar varias semanas ou mesmo meses por unha resolución que ata o de agora non se atrasaba moito máis de sete días, tardanza que tendo en conta a situación de extrema necesidade que padecen as persoas e familias demandantes das AEM resulta cruel e inasumible.
O pasado 25 de abril levamos a cabo unha asemblea aberta en torno a este problema á que estaban convidados Abel Caballero, Alcalde da cidade, e Isaura Abelairas, Concelleira de Política do Benestar, para que cumpriran coa súa obriga de informar e aportar solucións definitivas a este asunto. Sen embargo, nin acudiron ao encontro nin ofreceron explicacións de ningún tipo, polo que o 2 de maio, día no que tivo lugar o pleno no que se aprobaron os presupostos para 2014, achegámonos nós ao concello para denunciar publicamente a situación e esixir unha resposta inmediata.
Naquela ocasión aproveitamos para lembrarlles que, aínda que dende a alcaldía repiten ata a saciedade que vivimos nunha cidade fermosa, tamén vivimos nunha cidade famenta, na que un número inxente de persoas e familias carecen dos recursos económicos necesarios para facer fronte ás súas necesidades máis elementais, e que ante esta realidade ferinte os cartos públicos teñen que destinarse con absoluta prioridade a dar unha resposta inmediata e eficaz ao crecente empobrecemento que padece a cidadanía.
Sen embargo, hoxe, cando se cumpren dúas semanas dende aquela asemblea aberta á que os responsables políticos decidiron non acudir, seguen sen aportar solución algunha á terrible demora que estamos a denunciar. Por iso atopámonos outra vez ante o concello: para esixirlles ao alcalde e á concelleira que poñan enriba da mesa os recursos necesarios para resolver dunha vez por todas o “colapso” na tramitación das AEM, e que cumpran coa súa obriga de garantir que os cartos cheguen de xeito inmediato ás viguesas e vigueses que tanto as precisan.
Contra a exclusión, redistribución!
Dereitos Sociais para todas!
Renda Básica das iguais, XA!
Vigo, 9 de maio de 2014
---
Imaxes da concentración: www.flickr.com/photos/axluar/sets/72157644177059807
Vídeo da concentración: www.youtube.com/watch?v=dhhrN2zMuVI&feature=youtu.be
6.5.14
Concentración perante o colapso das Axudas de Emerxencia Municipais (convocatoria e crónica) 25/04/2014
Xa anunciaramos na convocatoria do 25 de abril que Se Mahoma non vai á montaña...iriamos nós onda eles. Por iso o VENRES 2 de maio, a partires das 10h00, a ODS-Coia, o Grupo de Axitación Social e parroquia do Cristo da Victoria convocamos unhaCONCENTRACIÓN ás portas do CONCELLO. E de novo convidamos ao alcalde e á concelleira a que ofrezan solucións ante os atrasos das Axudas de Emerxencia Municipais (AEM).
Abel Caballero e Isaura Abelairas, concelleira de Benestar Social néganse a explicar os motivos do colapso que sofre o departamento de servizos sociais do concello de Vigo. A calada por resposta. Mentres máis de dúas mil solicitudes de AEM están sen resolver. Igual que os problemas de moitas persoas, que acudimos a estas axudas para tratar de buscar vieiros polos que saír do empobrecemento que nos afoga.
Desempregadas ou con empregos precarios, sen pensións ou con elas recortadas, sen prestacións, sen axudas sociais... así temos que vivir, ou máis ben sobrevivir.
O pasado 25 de abril convocamos unha asemblea aberta para falar sobre a Política Social do Concello de Vigo, en concreto sobre os problemas na xestión das AEM nas últimas semanas. Ao acto estaban convidados o alcalde e a concelleira. Nin acudiron, nin deron explicación aos problemas denunciados. Preto dun cento de persoas escoitabamos como moita xente busca nestas axudas os euros necesarios para pagar a vivenda, a factura da luz, a bombona de butano, os alimentos dos cativos da casa... e como a resposta que atopaban era o silencio dos responsables políticos.
Contra a exclusión, redistribución! Dereitos Sociais para todas!
Renda Básica das iguais, XA!
Crónica da concentración perante o colapso das Axudas de Emerxencia Municipais
Hoxe o concello celebraba un pleno extraordinario no que se aprobaron os orzamentos para 2014. Ao mesmo tempo a praza do rei acollía dúas concentracións: unha reclamando dereitos sociais e outra da veciñanza de Teis a propósito do conflito polo centro cívico do barrio.
Convocadas pola ODS-Coia, a Parroquia Cristo da Victoria e o Grupo de Axitación Social (GAS) concentrámonos ás portas da casa consistorial para denunciar, unha vez máis, a vergoñenta e insoportable demora que están a padecer as solicitantes de Axudas de Emerxencia Municipal (AEM). Lembramos que estas, teñen como obxectivo “satisfacer necesidades básicas en relación coa alimentación, o aloxamento ou calquera outra situación que poida supoñer un factor de marxinalidade ou risco de exclusión social”. O atasco de máis de 2000 solicitudes nas dependencias de benestar social está a provocar que a resolución das AEM -que antes resolvíanse en algo máis de sete días- agora alónguense no tempo. Isto deixa a moitas persoas sen respostas a problemas tan graves como: o pago da vivenda ou de subministros básicos, a compra de alimentos básicos...
Por estas razóns, o venres 25 de abril levamos a cabo unha asemblea aberta á que estaban convidados Abel Caballero, Alcalde da cidade, e Isaura Abelairas, Concelleira de Política do Benestar, para que cumpriran coa súa obriga de informar e, sobre todo, de dar solucións. Eles nin acudiron ao evento, nin ofreceron explicacións.
Por iso hoxe achegámonos nós ao concello, para esixirlles ao alcalde e á concelleira que poñan enriba da mesa os recursos necesarios para solucionar dunha vez por todas o “colapso” na tramitación das AEM. Unha mesa e dúas cadeiras acomodamos durante a concentración para recibir as súas solucións. Quedaron baleiras.
Tras a lectura do manifesto e de berrarmos diferentes consignas, un grupo numeroso entrou na lonxa do concello. Do grupo, media ducia de persoas entraron no consistorio e tras esixir falar co alcalde ou coa concelleira de Benestar Social conseguiron manter un encontro coa concelleira. Isaura Abelairas e unha técnica do departamento escoitaron as reivindicacións por boca de tres compañeiras que volveron a por enriba da mesa as duras condicións de vida nas que nos deixan as súas políticas.
Achegamos o manifesto lido no acto:
Manifesto da concentración perante o colapso das Axudas de Emerxencia Municipais
Unha vez máis saímos á rúa convocadas pola ODS-Coia, a Parroquia Cristo da Victoria e o Grupo de Axitación Social (GAS) para denunciar a situación de total indefensión e precariedade na que as institucións públicas deixan a unha cidadanía cada vez máis empobrecida, vítima dun sistema económico excluínte que impide que dispoña do imprescindible para vivir con dignidade.
Desta vez concentrámonos diante do Concello de Vigo co obxectivo de denunciar a insoportable demora que nas últimas semanas se está a dar na xestión das Axudas de Emerxencia Municipal (AEM), que teñen como obxectivo “satisfacer necesidades básicas en relación coa alimentación, o aloxamento ou calquera outra situación que poida supoñer un factor de marxinalidade ou risco de exclusión social”. Debido ao “colapso” na tramitación destas axudas, na actualidade máis de 2000 unidades de convivencia están a agardar varias semanas ou mesmo meses por unha resolución que ata o de agora non se atrasaba moito máis de sete días, tardanza que tendo en conta a situación de extrema necesidade que padecen as persoas e familias demandantes das AEM resulta cruel e inasumible.
O pasado 25 de abril levamos a cabo unha asemblea aberta en torno a este problema á que estaban convidados Abel Caballero, Alcalde da cidade, e Isaura Abelairas, Concelleira de Política do Benestar, para que cumpriran coa súa obriga de informar e aportar solucións definitivas a este asunto. Sen embargo, nin acudiron ao encontro nin ofreceron explicacións de ningún tipo.
Por iso hoxe achegámonos nós ao concello, precisamente no momento no que está a ter lugar o pleno municipal no que se aprobarán os presupostos para 2014, para esixirlles ao alcalde e á concelleira que poñan enriba da mesa os recursos necesarios para solucionar dunha vez por todas o “colapso” na tramitación das AEM.
Dende a alcaldía repiten ata a saciedade que vivimos nunha cidade fermosa; nós queremos darlle a volta ao seu lema para lembrar que tamén vivimos nunha cidade famenta, na que un número inxente de persoas e familias carecen dos recursos económicos necesarios para facer fronte ás súas necesidades máis elementais: a alimentación, o pagamento da vivenda ou dos recibos da auga, da luz, do gas... Ante esta realidade ferinte non podemos deixar de reivindicar, no día no que os representantes políticos deciden en que gastarán os cartos públicos, que estes teñen que destinarse con absoluta prioridade a dar unha resposta inmediata e eficaz ao crecente empobrecemento que padece a cidadanía.
Nós agardaremos aquí esta mañá a que o Alcalde ou a Concelleira por fin se decidan a dar a cara e expliquen como van solucionar o atraso na xestión das AEM. E se tampouco hoxe se deciden, seguiremos a esixirlles publicamente que cumpran coa súa obriga de garantir que os recursos cheguen de xeito inmediato ás viguesas e vigueses que tanto as precisan.
Contra a exclusión, redistribución!
Dereitos Sociais para todas!
Renda Básica das iguais, XA!
Vigo, 2 de maio de 2014
Algunhas imaxes da concentración:www.flickr.com/photos/axluar/sets/72157644065839399
Vídeo do acto: www.youtube.com/watch?v=4gBT6mb6_E0&feature=youtu.be
Suscribirse a:
Entradas (Atom)